جوبلی ہلز ضمنی انتخاب، نوین یادو کانگریس کے امیدوار
کانگریس پارٹی نے جوبلی ہلز اسمبلی حلقہ کے ضمنی انتخاب کے لئے نوین یادو کو پارٹی کا امیدوار بنانے کا سرکاری طور پر اعلان کردیا ہے جس کے بعد کانگریس امیدوار کے تعلق سے پارٹی اور سیاسی حلقوں میں جو تجسس تھا وہ ختم ہوگیا ہے۔ صدر کل ہند کانگریس کمیٹی ملکارجن کھرگے کی منظوری کے بعد پارٹی کے قومی جنرل سکریٹری کے سی وینوگوپال نے اس سلسلے میں احکامات جاری کئے ہیں۔ جوبلی ہلز اسمبلی حلقہ کے ضمنی انتخاب کے لئے کانگریس پارٹی کے کئی قائدین دعویدار تھے اور ہرکوئی اپنی کوشش کررہا تھا۔ چیف منسٹر اے ریونت ریڈی نے اسمبلی حلقہ جوبلی ہلز کے انچارج وزراء کا ایک اجلاس طلب کرتے ہوئے امیدوار کے نام کی سفارش کرنے کی ہدایت دی تھی۔ وزراء کی رپورٹ کو صدر تلنگانہ پردیش کانگریس کمیٹی نے ہائی کمان کو روانہ کردیا تھا۔ پارٹی کے ذرائع سے پتہ چلا ہیکہ چیف منسٹر ریونت ریڈی نے پارٹی کے قومی صدر ملکارجن کھرگے سے مزاج پرسی کرنے کے لئے بنگلورو میں ملاقات کی تھی تب ہی انہوں نے نوین یادو کو امیدوار بنانے کے مسئلہ پر تبادلہ خیال کیا تھا۔ آج شام سرکاری طور پر اس کا اعلان کردیا گیا ہے۔ کانگریس پارٹی ابتداء سے جوبلی ہلز کے ضمنی انتخاب میں بی سی امیدوار کو انتخابی میدان میں اتارنے کا اشارہ دے رہی تھی۔ کانگریس کے قائد نوین یادو نے انہیں امیدوار بنانے پر پارٹی کے قومی صدر ملکارجن کھرگے، قائد اپوزیشن لوک سبھا راہول گاندھی، چیف منسٹر ریونت ریڈی، صدر تلنگانہ پردیش کانگریس کمیٹی مہیش کمار گوڑ سے اظہار تشکر کیا ہے۔
