ٹی پی سی سی کے نئے صدر کا عہدہ، کانگریس قائدین کی دوڑ دھوپ شروع
کانگریس ہائی کمان نے ٹی پی سی سی کے نئے صدر کے انتخاب کے بارے میں ابھی تک کوئی فیصلہ نہیں کیا ہے تاہم، بہت سے قائدین ہائی کمان کو خوش کرنے اور عہدہ حاصل کرنے کے لیے نئی دہلی کے چکر لگا رہے ہیں۔ اب تلنگانہ کانگریس قائدین کے ذہنوں میں یہ سوال ہے کہ کیا ہائی کمان پیرویوں کو قبول کرے گی یا ٹی پی سی سی صدر کے انتخاب میں حیرت انگیز فیصلہ کرے گی۔ تلنگانہ کانگریس قائدین کے ذہنوں میں ایک اور سوال یہ ہے کہ کیا ہائی کمان ذات پات کے مساوات کو متوازن رکھے گی یا اس عہدہ پر کسی ایسے قائد کو فائز کیا جائے گا جو پارٹی کو مضبوط کرے گا۔ پارٹی کی صدارت کے عہدے کے لیے سینئر قائدین جن میں ٹی پی سی سی کے کارگزار صدور ٹی جگا ریڈی اور انجن کمار یادو، ٹی پی سی سی تشہیری مہم کمیٹی کے چیئرمین مدھو یاشکی گوڑ اور اے آئی سی سی سکریٹری ایس اے سمپت کمار، کوشش کر رہے ہیں۔ معلوم ہوا ہے کہ قریب دس قائدین اس دوڑ میں شامل ہیں۔ کانگریس قائدین کا کہنا ہے کہ پارٹی نے چیف منسٹر کا عہدہ ریڈی کو اور ڈپٹی چیف منسٹر کا عہدہ مالا کو دیا۔ ٹی پی سی سی چیف کا عہدہ ایک اہم عہدہ ہے اور بی سی، ایس سی (مادیگا) اور ایس ٹی کے قائدین کو یہ عہدہ حاصل کرنے کا موقع ملنا چاہیے۔دریں اثنا، پارٹی میں ایک اور نظریہ گردش کر رہا ہے کہ ہائی کمان کسی ایسے شخص کو عہدہ دے گا جو وزیر، ایم ایل اے، ایم پی یا ایم ایل سی نہیں ہے یہ معلوم ہوا ہے کہ کانگریس ہائی کمان جون کے آخر تک ٹی پی سی سی کے نئے سربراہ کے نام کا اعلان کرے گی۔
