نیپال میں بارش کو لیکر نیا الرٹ جاری، ہمالیائی ملک میں سیلاب اور لینڈ سلائیڈنگ سے اب تک 240 لوگوں کی موت
نیپال کی حکومت نے بدھ کو شدید بارش کا نیا الرٹ جاری کیا۔ کئی دنوں سے جاری بارشوں نے بڑے پیمانے پر سیلاب اور لینڈ سلائیڈنگ کو جنم دیا ہے جس سے ہمالیائی ملک میں 240 سے زائد افراد ہلاک ہو چکے ہیں۔ نیپال کے وزیر داخلہ رمیش لیکھک نے حکام اور ڈیزاسٹر مینجمنٹ ایجنسیوں کو ہائی الرٹ رہنے کی ہدایت کی ہے کیونکہ موسم کی پیشن گوئی نے بدھ اور جمعرات کو کوسی اور باگمتی صوبوں کے ساتھ ساتھ کھٹمنڈو وادی میں شدید بارش کی پیش گوئی کی ہے۔ یہ انتباہ محکمہ ہائیڈرولوجی اینڈ میٹرولوجی کی جانب سے دونوں صوبوں کے حصوں میں مزید شدید بارشوں کے ممکنہ خطرات کے بعد سامنے آیا ہے۔ لیکھک نے نیشنل ڈیزاسٹر رسک ریڈکشن اینڈ مینجمنٹ اتھارٹی (NDRRMA)، چیف ضلعی حکام اور مقامی حکومتوں پر زور دیا کہ وہ آفات کے ممکنہ خطرے سے چوکنا رہیں۔ وزارت نے عوام سے بھی اپیل کی کہ وہ چوکنا رہیں اور بھاری بارش اور اس کے نتائج کے ممکنہ خطرات کو کم کرنے کے لیے تیار رہیں۔ لیکھک نے کہا، میں نے کوسی اور باگمتی صوبوں کے چیف ڈسٹرکٹ آفیسرز اور آفات کے شکار صوبوں میں تمام سیکورٹی ایجنسیوں کے سربراہوں کو الرٹ رہنے کی ہدایت کی ہے۔ لیکھک نے مسافروں سے بارشوں کے باعث لینڈ سلائیڈنگ اور سیلاب کے پیش نظر اہم شاہراہوں اور سڑکوں کی حالت کو مدنظر رکھتے ہوئے سفر کے دوران محتاط رہنے کی ہدایت دی ۔ وزارت داخلہ کے ترجمان رشیرام تیواری نے کہا کہ اب تک 13,071 لوگوں کو سیلاب سے متاثرہ علاقوں سے بچایا گیا ہے جمعرات کو شروع ہونے والی بارشوں نے اتوار تک کئی صوبوں میں بڑے پیمانے پر تباہی مچا دی، ہزاروں افراد بے گھر ہو گئے۔ مشرقی اور وسطی نیپال کے بڑے حصے جمعہ سے زیر آب ہیں۔ تلاش، بچا ؤاور راحت کی تقسیم کے لیے نیپال آرمی، مسلح پولیس فورسز اور نیپال پولیس سمیت 20,000 سے زیادہ سیکورٹی اہلکار تعینات کیے گئے ہیں۔
