جھارکھنڈ الیکشن: انڈیا الائنس میں سیٹوں کی تقسیم فائنل، جانئے کون پارٹی کتنی سیٹوں پر لڑے گی؟

جھارکھنڈ انڈیا اتحاد میں سیٹوں کی تقسیم پر بات چیت تقریباً طے ہوگئی ہے۔ وزیراعلی ہیمنت سورین نے رانچی میں اس کا اشارہ دیا۔ انہوں نے ایک پریس کانفرنس میں کہا کہ تمام پارٹیاں اپنا اپنا دعوی کر رہی ہیں، لیکن انڈیا اتحاد اس اسمبلی الیکشن کو مضبوطی سے لڑے گا۔ انہوں نے یہ بھی بتایا کہ بائیں بازو بھی نئے اتحادی کے طور پر اس اتحاد میں شامل ہو رہا ہے۔ انہوں نے یہ بھی کہا کہ اتحاد میں 70 سیٹوں پر جے ایم ایم اور کانگریس کے امیدوار ہوں گے، جب کہ باقی 11 سیٹوں پر دیگر اتحادی پارٹنرز الیکشن لڑیں گے۔ حالانکہ وزیراعلی ہیمنت سورین نے پارٹیوں کے لحاظ سے کوئی اعداد و شمار نہیں بتائے، لیکن انہوں نے کہا کہ آر جے ڈی اور بائیں بازو کی جماعتوں کے لیے 11 سیٹیں چھوڑ دی گئی ہیں۔ بعد میں معلومات دی جائیں گی کہ کون کتنی سیٹوں پر اور کہاں سے الیکشن لڑے گا۔ انہوں نے کہا کہ آر جے ڈی اور سی پی آئی ایم ایل 11 سیٹوں پر اپنے امیدوار کھڑے کریں گے۔ وہیں نیوز 18 کو ذرائع سے خبر ملی ہے کہ سیٹوں کی تقسیم کو بڑی حد تک حتمی شکل دے دی گئی ہے۔ اس کے تحت جھارکھنڈ مکتی مورچہ 43 سے 45 سیٹوں پر الیکشن لڑے گا، جب کہ کانگریس 25 سے 27 سیٹوں پر، آر جے ڈی 7 اور سی پی آئی ایم ایل چار سیٹوں پر الیکشن لڑ سکتی ہے۔