جنگ کے بعد اسرائیل’ غزہ پٹی امریکہ کے حوالے کرے گا: ٹرمپ
غزہ سے متعلق امریکی صدر ٹرمپ کے بیان پر عالمی ردعمل دھرا رہ گیا، وائٹ ہاؤس اور محکمہ خارجہ کی وضاحتیں بھی کسی کام نہ آئیں اور امریکی صدر نے ایک بار پھر غزہ پر قبضے کا بیان دْہرا دیا۔ٹرمپ نے کہا کہ جنگ ختم ہونے کے بعد غزہ کی پٹی اسرائیل کے ذریعے امریکہ کے حوالے کردی جائے گی۔انہوں نے کہا کہ اس وقت تک فلسطینی اس خطہ میں نئے اور جدید گھروں کے ساتھ کہیں زیادہ محفوظ اور خوبصورت کمیونٹیز میں دوبارہ آباد ہو چکے ہوں گے۔ٹرمپ نے کہا کہ امریکہ احتیاط سے غزہ کی تعمیر شروع کرے گا اور دنیا کے بہترین ترقیاتی اداروں کے ساتھ مل کر کام کرے گا۔ٹرمپ کا مزید کہنا تھا کہ تعمیرِ نو کے بعد غزہ پٹی اپنی نوعیت کی سب سے عظیم اور سب سے شاندار پیش رفت میں سے ایک ہوگی۔انہوں نے کہا کہ اس کام کیلئے امریکہ کو کسی فوج کی ضرورت نہیں پڑے گی اور اس سے خطے میں استحکام آئے گا۔ امریکی صدر ڈونلڈ ٹرمپ نے عالمی فوجداری عدالت (آئی سی سی) پر پابندیاں لگانے کا بھی فیصلہ کرلیا اوروہ جلد ہی پابندیوں کے اگزیکیٹو آرڈر پر دستخط کریں گے ۔ ۔
