سعودی عرب: عید الفطر کی تقریبات کے لیے تیاریاں عروج پر

سعودی عرب کی جنرل انٹرٹینمنٹ اتھارٹی نے عید الفطر 2025 کے تقریبات کی تفصیلات جاری کر دی ہیں، جس میں مختلف سرگرمیاں شامل ہیں تاکہ اس موقع کو شاندار طریقے سے منایا جا سکے۔سعودی پریس ایجنسی کے مطابق، جی ای اے نے ملک بھر میں ایک وسیع جشن کا اعلان کیا ہے، جس میں کنسرٹس، تھیٹر پرفارمنس، آتش بازی اور تفریحی زونز میں مختلف سرگرمیاں شامل ہوں گی، جو رہائشیوں اور سیاحوں کے لیے ناقابلِ فراموش تجربات فراہم کریں گی۔ موسیقی کے کنسرٹس ریاض، شقرا، ابہا، قصیم، جدہ اور مشرقی خطے کے شہروں میں منعقد ہوں گے، جبکہ تھیٹر پرفارمنس ریاض (یکم تا 19 اپریل)، جدہ (یکم تا 6 اپریل) اور دمام (یکم تا 3 اپریل) میں پیش کی جائیں گی۔رات 9 بجے آتش بازی کے شاندار مناظر اہم مقامات پر آسمان کو روشن کریں گے، جن میں ریاض کے بولیوارڈ ورلڈ، جدہ آرٹ پرومنیڈ، الخبر کورنیش، اور طائف کے عردف پارک شامل ہیں۔ عید کی تقریبات پہلے دن ریاض کے بولیوارڈ سٹی، بولیوارڈ ورلڈ، وی آئی اے ریاض، اور جدہ آرٹ پرومنیڈ میں شروع ہوں گی، جبکہ دوسرے دن الخبر کے سٹی ہب میں تفریحی سرگرمیاں جاری رہیں گی، جو ہر عمر کے افراد کے لیے موزوں اور خاندانی تفریح فراہم کریں گی۔یہ تقریبات عید الفطر کے جشن کو شاندار بنانے اور مملکت کے تفریحی شعبے کو فروغ دینے کے لیے جی ای اے کے عزم کو اجاگر کرتی ہیں۔