این ایچ آر سی نے جھانسی میں 10 نوزائیدہ بچوں کی موت پر اتر پردیش حکومت سے رپورٹ طلب کی
قومی انسانی حقوق کمیشن (این ایچ آر سی) نے اتر پردیش کے جھانسی میڈیکل کالج اور اسپتال میں 10 نوزائیدہ بچوں کی موت کا از خود نوٹس لیا ہے۔ کمیشن نے ریاست کے چیف سکریٹری اور ڈائرکٹر جنرل آف پولیس کو ایک ہفتہ کے اندر اس معاملے میں تفصیلی رپورٹ طلب کرتے ہوئے کہا ہے کہ کمیشن نے ایک میڈیا رپورٹ کا از خود نوٹس لیا ہے۔ جھانسی ضلع میں 15 نومبر کو ممبئی کے مہارانی لکشمی بائی میڈیکل کالج اور اسپتال کے نوزائیدہ انتہائی نگہداشت یونٹ (این آئی سی یو) میں لگنے والی آگ میں کم از کم 10 نوزائیدہ بچوں کی موت ہو گئی۔ ان اموات کے علاوہ کل 16 بچے زخمی ہوئے جبکہ 37 کو بچا لیا گیا۔ کمیشن نے کہا کہ پولیس حکام نے مبینہ طور پر اس بات کی تصدیق کی ہے کہ آگ بجلی کے شارٹ سرکٹ کی وجہ سے لگی اور جو بچے ہلاک ہوئے وہ واقعے کے وقت انکیوبیٹر میں تھے۔ کمیشن نے پایا کہ میڈیا رپورٹس کا مواد واقعی پریشان کن ہے اور اس سے غفلت کی نشاندہی ہوتی ہے جس کے نتیجے میں متاثرہ شیر خوار بچوں کے انسانی حقوق کی سنگین خلاف ورزی ہوتی ہے کیونکہ وہ سرکاری ادارے کی دیکھ بھال میں تھے۔
