بہار کے 17 اضلاع میں دھند اور شدید سردی کا الرٹ
پٹنہ کے موسمیاتی مرکز نے بہار کے 17 اضلاع میں 19 دسمبر تک شدید سردی اور دھند کو لیکر الرٹ جاری کیا ہے۔ شمال مغربی ہندوستان میں شدید سردی کا اثر بہار میں بھی نظر آئے گا۔ شدید سردی کے پیش نظر محکمہ ڈیزاسٹر نے ٹول فری نمبر جاری کیا ہے۔گزشتہ 24 گھنٹوں کی رپورٹ میں روہتاس کا ڈہری سرد ترین ضلع کے طور پر درج کیا گیا ہے۔ یہاں کم سے کم درجہ حرارت 6.5 ڈگری سیلسیس رہا۔ اس کے بعد سیتامڑھی کا پپری 9.3، مدھے پورہ 9.3، مظفر پور 9.6، گوپال گنج 10، مدھوبنی 10.2، مغربی چمپارن ضلع کے والمیکی نگر 11.9 اور سپول 12.8 رہا۔ ان تمام اضلاع میں کم سے کم درجہ حرارت 0.1 سے 0.6 ڈگری تک گر گیا ہے ۔موسمیاتی مرکز کے مطابق مغربی چمپارن، سارن، سیوان، بکسر، پٹنہ، شیخ پورہ، نالندہ، جہان آباد، مظفر پور، ویشالی، دربھنگہ، بیگوسرائے، سمستی پور، مدھے پورہ، جموئی، بھاگلپور اور کٹیہار کے بیشتر حصوں میں دھند کا اثر نظر آئے گا۔ یہاں دیر رات اور صبح کے اوقات میں دھند چھائی رہے گی۔
