عمر عبداللہ کوجموں و کشمیر کا وزیر اعلیٰ بننے پر ممتا بنرجی نے مبارکباد پیش کی

عمر عبداللہ نے جمعرات کو جموں و کشمیر کے وزیر اعلیٰ کے طور پر حلف لیا۔ یہ ان کا دوسرا دور ہے۔ ان کی پارٹی، نیشنل کانفرنس (جے کے این سی) نے اتحادی شراکت داروں کے ساتھ مل کر اکثریت حاصل کی اور حکومت بنائی۔ اس پر مغربی بنگال کی وزیر اعلیٰ ممتا بنرجی نے ٹویٹر کے ذریعے عمر عبداللہ کو مبارکباد دی۔ انہوں نے کہا کہ یہ نہ صرف عمر عبداللہ کی ذاتی جیت ہے بلکہ جموں و کشمیر کے لوگوں کے لئے بھی ایک اہم لمحہ ہے جنہوں نے جمہوریت کے اس جشن میں شرکت کی اور اسے کامیاب بنایا۔ ممتا نے جموں و کشمیر کے شہریوں کے کردار کی تعریف کرتے ہوئے انہیں ”جمہوریت کے حقیقی معمار” قرار دیا۔ انہوں نے کہا کہ اگرچہ یہ عمر عبداللہ کا دوسرا دور ہے لیکن اس بار صورتحال مختلف ہے۔ قابل ذکر ہے کہ 8 اکتوبر کو انتخابی نتائج کے بعد عمر عبداللہ نے کئی آزاد اور دیگر جماعتوں کی حمایت حاصل کی تھی۔ اس اتحاد نے انہیں حکومت بنانے میں مدد کی اور جمعرات (16 اکتوبر) کو انہوں نے باضابطہ طور پر وزیر اعلیٰ کے طور پر حلف لیا۔