سلمان خان کو پھر دھمکی، 5 کروڑ دو۔ ورنہ حالت بابا صدیقی سے بھی بدتر ہو گی
فلم اداکار سلمان خان کو ایک بار پھر جان سے مارنے کی دھمکیاں موصول ہوئی ہیں۔ ممبئی ٹریفک پولیس کے واٹس ایپ نمبر پر موصول ہونے والے اس دھمکی آمیز پیغام میں کہا گیا ہے کہ 5 کروڑ روپے دو، ورنہ حالت بابا صدیقی سے بھی بدتر ہو گی۔ ممبئی پولیس نے اس واٹس ایپ میسج کی تحقیقات شروع کردی ہے۔ پولیس کے مطابق ممبئی ٹریفک پولیس کے واٹس ایپ نمبر پر دھمکی آمیز پیغام موصول ہوا ہے۔ پیغام بھیجنے والے نے مبینہ طور پر دھمکی دی کہ اگر رقم نہ دی گئی تو ‘سلمان خان کی حالت بابا صدیقی سے بھی بدتر ہو جائے گی’۔ پیغام میں کہا گیا کہ ‘اسے ہلکے میں نہ لیں، اگر سلمان خان زندہ رہنا چاہتے ہیں اور لارنس بشنوئی سے دشمنی ختم کرنا چاہتے ہیں تو انہیں 5 کروڑ روپے ادا کرنے ہوں گے، اگر رقم نہ دی گئی تو سلمان خان کی حالت بھی بابا صدیقی سے بھی بری ہوگی۔” اس دھمکی آمیز پیغام کے بعد پولیس نے مقدمہ درج کر کے تفتیش شروع کر دی ہے۔ قابل ذکر ہے کہ مہاراشٹر کے سابق وزیر بابا صدیقی (66) کو 12 اکتوبر کی رات ممبئی کے باندرہ میں گولی مار کر ہلاک کر دیا گیا تھا۔ پولیس اس معاملے میں اب تک چار لوگوں کو گرفتار کر چکی ہے۔
