بی سی تحفظات کیلئے خصوصی کمیشن کے اعلان کا خیرمقدم
تلنگانہ میں بی سی تحفظات کیلئے خصوصی کمیشن کے قیام سے متعلق حکومت کے فیصلہ کا خیرمقدم کرتے ہوئے بی سی تنظیموں کے قائدین نے چیف منسٹر ریونت ریڈی سے ان کی قیامگاہ پر ملاقات کی۔ سابق رکن راجیہ سبھا آر کرشنیا ، رکن اسمبلی ڈی ناگیندر، فشرمین کارپوریشن کے صدرنشین سائی کمار اور مختلف بی سی تنظیموں کے قائدین نے چیف منسٹر سے ان کی قیامگاہ پر ملاقات کی۔ انہوں نے بی سی تحفظات کے مسئلہ پر ہائی کورٹ کے احکامات پر عمل آوری کے ذریعہ خصوصی کمیشن کے قیام کا خیرمقدم کیا۔ اس موقع پر چیف منسٹر ریونت ریڈی کو تہنیت پیش کی گئی ۔ آر کرشنیا اور دیگر قائدین نے امید ظاہر کی کہ خصوصی کمیشن کے قیام سے تلنگانہ میں بی سی طبقات کے ساتھ انصاف ہوگا۔ چیف منسٹر نے کہا کہ ہائی کورٹ کے فیصلہ پر عمل کرتے ہوئے حکومت نے خصوصی کمیشن کے قیام کا فیصلہ کیا ہے اور جلد ہی احکامات جاری کئے جائیں گے ۔ رکن اسمبلی ڈی ناگیندر اور دوسروں نے کہا کہ چیف منسٹر نے بی سی طبقات کو ہر سطح پر انصاف فراہم کرنے کی مساعی کی ہے۔
