ضلع پولیس ادھم پور نے پانچ اسپا سنٹرز کو سیل کیا

ضلع پولیس ادھم پور نے مجسٹریٹ کے ہمراہ مشترکہ کارروائی کرتے ہوئے ادھم پور شہر میں غیر قانونی طور پر چلنے والے پانچ اسپا سینٹرز کو سیل کر دیا جو ضروری اجازت ناموں اور لائسنس کے بغیر سرگرم تھے۔ ان اسپا سینٹرز میں بلیو لوٹس اسپا سینٹر، پلانیٹ اسپا سینٹر، گولڈن ہوٹل اسپا سینٹر، پلانیٹ 2 اسپا سینٹر، اور کیو 2 تھائی اسپا سینٹر شامل ہیں۔ یہ تمام مراکز بغیر قانونی کاروباری رجسٹریشن، صحت و حفاظتی سرٹیفکیٹس اور دیگر ضروری لائسنس کے کام کر رہے تھے۔ جب ان مراکز کی انتظامیہ سے دستاویزی ثبوت فراہم کرنے کا مطالبہ کیا گیا تو وہ اس میں ناکام رہے۔ اس کے نتیجے میں فوری طور پر ان سینٹرز کو بند کر دیا گیا۔ پولیس نے اس سلسلے میں مزید کارروائی کے لیے ابتدائی تحقیقات کا آغاز کر دیا ہے۔