مظفر پور میں جے ڈی یو لیڈر کے گھر میں لوٹ، خواتین سے نقدی، زیورات اور موبائل کی لوٹ

بہار کے مظفر پور کے صدر تھانہ علاقے میں گذشتہ شب بدمعاشوں نے بے خوف ہوکر ایک بڑی واردات کو انجام دیا۔ عام لوگوں کے ساتھ ساتھ لیڈروں کو بھی نشانہ بنایا جا رہا ہے۔ جے ڈی یو بلاک صدر اور سابق سرپنچ رمیش کمار اوجھا عرف بپلوی کے گھر لوٹ مار ہوئی۔ 4 سے 5 نقاب پوش بدمعاشوں نے اسلحہ کی نوک پر طلائی زیورات اور نقدی لوٹ لی۔سابق سرپنچ رمیش کمار اوجھا کی اہلیہ شویتا بھارتی نے کہا کہ ہم بستر پر بیٹھ کر سیریل دیکھ رہے تھے۔ اچانک ایک آدمی کمرے میں داخل ہوا۔ ہم لوگ ڈرتے ڈرتے اٹھ کھڑے ہوئے۔ پوچھا بھائی کہا ں ہے؟ ہم لوگوں نے کچھ نہیں کہا۔ باہر نکلے تو دیکھا کہ مین گیٹ کے اندر پانچ لڑکے کھڑے تھے اور دو کاریں وہاں کھڑی تھیں۔ میرے شوہر کمبھ میں نہانے گئے تھے۔ شویتا بھارتی کا مزید کہنا تھا کہ ان کے جانے کے بعد ہم لوگوں نے مین گیٹ کو تالالگا دیا اور ان کے شوہر کو فون کر کے واقعے سے آگاہ کیا۔ موصولہ اطلاعات کے مطابق دیر شام کچھ لوگوں نے سابق سرپنچ کے بارے میں دریافت کیا تو گھر والوں نے بتایا کہ وہ نہانے کے لیے پریاگ راج گئے ہیں۔ صرف چند گھنٹے بعد رات کے وقت مجرموں نے یہ واردات کو انجام دیا۔واقعہ کی اطلاع اہل خانہ کو ملتے ہی انہوں نے پولیس کو اطلاع دی تاہم صدر تھانہ پولیس نے جائے وقوعہ کا معائنہ نہیں کیا۔ صرف گاڑی نمبر 112 موقع پر پہنچی اور اہل خانہ کو تھانہ میں درخواست دینے کا مشورہ دے کر واپس چلی گئی۔ تاہم بعد میں پولیس نے چوکسی کا مظاہرہ کرتے ہوئے کارروائی شروع کردی۔اس واقعہ کے بعد اوجھا خاندان صدمے میں ہے اور مقامی لوگوں میں بھی ناراضگی ہے۔ فی الحال رمیش کمار اوجھا پریاگ راج سے واپس آرہے ہیں اور ان کے پہنچنے کے بعد تھانہ میں سرکاری شکایت درج کروائی جائے گی۔اہل علاقہ نے انتظامیہ سے مطالبہ کیا ہے کہ جلد از جلد مجرموں کی نشاندہی کر کے انہیں گرفتار کیا جائے تاکہ علاقے میں امن و امان بحال ہو سکے۔