عاشور خانہ بڑا شاہی معاملہ کی وقف بورڈ سے تحقیقات کا آغاز
تلنگانہ ریاستی وقف بورڈ نے عاشور خانہ بڑا شاہی معاملہ میں تحقیقات کا آغاز کردیا ہے لیکن اس تحقیقات کے دوران مزید کئی جائیدادوں پر این اوسی جاری کئے جانے کے انکشافات ہونے لگے ہیں لیکن وقف بورڈ ان معاملات کی باضابطہ تحقیقات کے آغاز سے گریز کر رہا ہے جبکہ وقف بورڈ میں موجود نام نہاد دیانتدار اعلیٰ عہدیدار کو تو چاہئے کہ وہ فوری طور پر کاروائی کرتے ہوئے وقف بورڈ میں خدمات انجام دینے والے ملازمین کی جائیدادوں کے متعلق تفصیلات حاصل کرنے کے لئے تحقیقات کی سفارش کرتے ہوئے کم از کم عملہ کے ان افراد کے خلاف ویجلنس کے ذریعہ تحقیقات کا آغاز کروائے جن کے نام ان این او سی کی اجرائی کے معاملہ میں منظر عام پر آئے ہیں ۔ ذرائع کے مطابق وقف بورڈ نے سابق سی ای او کو جن کی دستخط سے این او سی جاری کی گئی تھی انہیں طلب کرتے ہوئے باضابطہ تحقیقات شروع کرنے کے بجائے معلومات حاصل کرنے کی کوشش کی ہے اور سابق سی ای او نے اس سلسلہ میں وقف بورڈ سے تعاون کا تیقن دیا ہے جبکہ حقیقت یہ ہے کہ وقف بورڈ کے ذریعہ این او سی کی اجرائی کی سنگین جرم ہے اور اس جرم کے خلاف وقف بورڈ کی ذمہ داری ہے کہ وہ سب سے پہلے پولیس میں شکایت درج کرواتے ہوئے معاملہ میں ملوث تمام افراد کے خلاف مقدمہ درج کروائے ۔ تلنگانہ ریاستی وقف بورڈ کے ذمہ داروں کو چاہئے کہ وہ کھمم کی اراضی کے معاملہ میں جاری کی گئی این او سی کے علاوہ کتنی این اوسی جاری کی گئی ہیں اس کی تفصیلات منظر عام پر لائیں کیونکہ اس مدت میں جب یہ این اوسی جاری کی گئی تھی اسی دوران مزید کئی جائیدادوں کی این او سی جاری کرنے کے علاوہ مقدمات میں جان بوجھ کر موقوفہ جائیدادوں کے مقدمات میں شکست کے الزامات بھی عائد ہوچکے ہیں۔ ذرائع سے موصولہ تفصیلات کے مطابق این او سی کی اجرائی کے معاملہ میں ملوث بورڈ کے اہلکاروں کو بچانے اور ان کے خلاف کسی بھی طرح کی کاروائی نہ ہواس بات کو یقینی بنانے کے لئے عہدیدار سرگرم ہے جبکہ این اوسی کی اجرائی کے معاملہ میں ملوث عملہ کے افراد کے اثاثہ جات کی اگر تحقیقات کی جاتی ہیں اور انسداد رشوت ستانی محکمہ میں باضابطہ شکایت درج کرواتے ہوئے ان کی منقولہ و غیر منقولہ جائیدادوں کی تفصیلات کے متعلق آگہی حاصل کی جاتی ہے تو ایسی صورت میں بورڈ میں جاری دھاندلیوں کا انکشاف ہوگا بصورت دیگر بورڈ کی چال بے ڈھنگی کا معاملہ یوں ہی جاری رہے گا.
