می سیوا خدمات کو عوام کی دہلیز تک پہنچانے نئی سرویس متعارف
وزیر انفارمیشن ٹکنالوجی ڈی سریدھر بابو نے کہا کہ تلنگانہ میں ڈیجیٹل حکمرانی کو یقینی بنانے کیلئے عوامی خدمات کو عصری سہولتوں سے آراستہ کیا جارہا ہے ۔ تلنگانہ حکومت ڈیجیٹل گورننس کے معاملہ میں ملک کیلئے رول ماڈل بن چکی ہے اور عوامی خدمات کو مزید بہتر بناتے ہوئے عوام کی دہلیز تک پہنچایا جارہا ہے ۔ سریدھر بابو نے باغ لنگم پلی کے آر ٹی سی کلیان منڈپم میں می سیوا ڈور ڈیلیوری سرویس کا آغاز کیا ۔ سریدھر بابو نے کہا کہ حکومت ٹکنالوجی کے شعبہ میں اصلاحات کے ذریعہ عوامی خدمات میں جوابدہی اور شفافیت کو یقینی بنارہی ہے ۔ عوام نئی خدمات کے تحت ٹول فری نمبر 1100 کے ذریعہ سلاٹ بک کرسکتے ہیں یا می سیوا پورٹل کے ذریعہ گھر پر عوامی خدمات کو حاصل کرسکتے ہیں ۔ انہوں نے کہا کہ برتھ اینڈ ڈیٹتھ سرٹیفیکٹس کے علاوہ پولیس ڈپارٹمنٹ کی مختلف خدمات کو می سیوا کے ذریعہ حاصل کیا جاسکتا ہے ۔ انہوں نے بتایا کہ 70 سے زائد می سیوا ایجنٹ کو ڈور ڈیلیوری خدمات کی ٹریننگ دی گئی ہے ۔ نئی خدمات ابتدائی مرحلہ میں کیور اربن علاقوں میں حاصل رہیں گی اور بعد میں ریاست گیر سطح پر توسیع دی جائے گی ۔ سریدھر بابو نے کہا کہ حکومت ٹکنالوجی کے استعمال کے ذریعہ عوامی خدمات کو بہتر بنانے کے علاوہ عہدیداروں کو جوابدہ اور خدمات کو شفاف بنانے میں یقین رکھتی ہے ۔ سریدھر بابو نے می سیوا مراکز کی کارکردگی کو سراہا اور عوامی خدمات کو مزید بہتر بنانے کا مشورہ دیا ۔ اس موقع پر انفارمیشن ٹکنالوجی کے جوائنٹ سکریٹری انودیپ درشٹی ، کمشنر می سیوا روی کرن اور تلنگانہ ٹکنالوجی سروسیس کے منیجنگ ڈائرکٹر ستیہ نارائن ریڈی موجود تھے ۔
