مہاراشٹر کے وزیر اعلیٰ ایکناتھ شندے نے وزیر اعلیٰ کے عہدے سے دیا استعفیٰ
مہاراشٹر کے وزیر اعلیٰ ایکناتھ شندے نے منگل کو گورنر سی پی رادھا کرشنن سے ملاقات کی اور وزیراعلیٰ کے عہدہ سے اپنا استعفیٰ پیش کیا۔ گورنر نے ایکناتھ شندے سے کہا ہے کہ وہ نئے وزیر اعلیٰ کی تقرری تک قائم مقام وزیر اعلیٰ کے طور پر کام کریں۔ گورنر جلد ہی ریاست کی سب سے بڑی سیاسی جماعت کو حکومت بنانے کی دعوت دیں گے۔ ریاست میں 14ویں اسمبلی کی تشکیل سال 2019 میں ہوئی تھی۔ 14ویں اسمبلی کی مدت 26 نومبر یعنی آج ختم ہو رہی ہے۔ اس وجہ سے وزیر اعلی ایکناتھ شندے، نائب وزیر اعلی دیویندر فڑنویس، نائب وزیر اعلی اجیت پوار آج صبح 11 بجے ممبئی کے راج بھون پہنچے اور ایکناتھ شندے نے گورنر سی پی رادھا کرشنن کو اپنا استعفیٰ سونپ دیا۔ وزیر اعلیٰ کے استعفیٰ کے بعد 14ویں حکومت کی کابینہ ازخود تحلیل ہو گئی ہے۔ شندے گروپ کے شیو سینا کے ترجمان دیپک کیسرکر نے کہا کہ آج وزیر اعلیٰ ایکناتھ شندے نے اپنے عہدے سے استعفیٰ دے دیا ہے۔ یہ آئینی دفعات کے تحت کیا گیا ہے۔ بہت جلد این ڈی اے اتحاد کی اتحادی جماعتوں کے قائدین کی میٹنگ ہوگی اور نئے وزیر اعلیٰ کا فیصلہ کیا جائے گا۔ انہوں نے کہا کہ وزیر اعلیٰ کے عہدہ کو لے کر این ڈی اے اتحاد میں کوئی ناراضگی نہیں ہے۔ قابل ذکر ہے کہ ریاست میں 15ویں اسمبلی کے لیے انتخابات 20 نومبر کو ہوئے تھے اور ووٹوں کی گنتی 23 نومبر کو مکمل ہوئی تھی۔ اس الیکشن میں این ڈی اے اتحاد کو مہاراشٹر کی کل 288 سیٹوں میں سے 232 سیٹیں ملی ہیں۔ ان میں سے بی جے پی کو 132، شیو سینا شندے گروپ کو 57 اور این سی پی اجیت پوار کو 41 سیٹیں ملی ہیں۔ وہیں مہاوکاس اگھاڑی کو کل 48 سیٹیں ملی ہیں۔ ان میں سے شیو سینا یو بی ٹی کو 20، کانگریس کو 16، این سی پی شرد پوار گروپ کو 10 اور سماج وادی پارٹی کو 2 سیٹیں ملی ہیں۔ روایت کے مطابق گورنر سب سے بڑی پارٹی بی جے پی کو حکومت بنانے کی دعوت دے سکتے ہیں۔
