بہاربجٹ سیشن: سی پی آئی (ایم ایل) ایم ایل اے نے ہاتھوں میں ہتھکڑیاں لگا کر احتجاج کیا

بہاراسمبلی کے بجٹ اجلاس کے پہلے دن جمعہ کے روز اپوزیشن جماعتوں نے مرکزی حکومت کے خلاف احتجاج کیا۔ سی پی آئی (ایم ایل) کے ایم ایل اے نے ہاتھوں میں ہتھکڑیاں لگا کر احتجاج کیا۔مالے ایم ایل اے کا یہ عجیب و غریب احتجاج امریکہ سے ہندوستانیوں کو ہتھکڑیاں لگا کر ہندوستان بھیجنے کے حالیہ واقعہ کے خلاف احتجاج میں کیا گیا۔ بھارت کی عزت نفس سے کھیلنا بند کرو ، امریکہ کی طرف سے بھارتی تارکین وطن کے ساتھ انتہائی ذلت آمیز سلوک پر مرکزی حکومت کیوں خاموش ہے ، شرم کرو، جیسے نعرے لگائے گئے۔ اس دوران ہتھکڑیاں لگاکر احتجاج کرنے والے ایم ایل اے نے کہا کہ اس سے بڑی بھارت کی توہین نہیں ہو سکتی۔ لیکن مرکزی حکومت اس معاملے پر خاموش ہے۔ انہیں شرم آنی چاہئے کہ ہندوستانیوں کے ساتھ اس قدر ہتک آمیز سلوک کیا جا رہا ہے۔ 4 فروری کو صبح 3 بجے، 104 ہندوستانی غیر قانونی تارکین وطن کو امریکہ سے ہندوستان واپس بھیجا گیا ۔ یہ پہلا موقع ہے جب تارکین وطن کو امریکہ بھیجنے کے لیے فوجی طیارے کا استعمال کیا گیا۔ 5 فروری کو دوپہر 2 بجے امریکی فوج کا ایک سی – 17 طیارہ ہندوستانی غیر قانونی تارکین وطن کو لے کر امرتسر ہوائی اڈے پر پہنچا۔ ہندوستان پہنچنے میں تقریباً 35 گھنٹے لگے ۔ اس دوران یہ بھی دیکھا گیا کہ غیر قانونی تارکین کو ہتھکڑیاں لگائی گئیں۔ غیر قانونی تارکین وطن ہندوستان آئے اور اپنے دردناک اور ذلت آمیز سفر کے حوالے سے اپنے درد کا اظہار کیا۔قابل ذکر ہے کہ بہار قانون ساز اسمبلی کا بجٹ اجلاس جمعہ 28 فروری سے شروع ہو رہا ہے۔ یہ سیشن تقریباً ایک ماہ تک جاری رہے گا۔ جس میں کل 19 اجلاس منعقد ہوں گے۔ پہلے دن یعنی آج ریاستی حکومت اقتصادی سروے پیش کرے گی جس کے بعد گورنر عارف محمد خان دونوں ایوانوں کے مشترکہ اجلاس سے خطاب کریں گے۔ نائب وزیر اعلیٰ سمراٹ چودھری 3 مارچ کو نتیش حکومت کا بجٹ پیش کریں گے ۔ سب کی نظریں اس پر ہوں گی کیونکہ یہ الیکشن کا سال ہے۔