بہار کے سیمانچل اضلاع میں زلزلے کے جھٹکے

بہار کی راجدھانی پٹنہ سمیت سیمانچل اضلاع میں آج صبح زلزلے کے جھٹکے سب سے پہلے 2:36 پر محسوس کیے گئے۔ نیشنل سینٹرفار سیسمولوجی کے مطابق زلزلہ نیپال کے باگمتی صوبے میں آیا۔ جرمن ریسرچ سینٹر فار جیو سائنس نے زلزلے کی شدت 5.6 اور گہرائی 10 کلومیٹر ( 6.21 میل) بتائی ہے ، جب کہ امریکی جیولوجیکل سروے نے اس کی شدت 5.5 بتائی ہے ۔ زلزلے کے اثرات کا ابھی اندازہ لگایا جا رہا ہے حالانکہ کسی جانی یا مالی نقصان کی کوئی اطلاع نہیں ہے۔ قابل ذکر ہے کہ نیپال دنیا کے سب سے زیادہ زلزلہ زدہ علاقوں میں واقع ہے۔ جہاں ہندوستانی ٹیکٹونک پلیٹ ہر سال تقریباً 5 سینٹی میٹر کی شرح سے یوریشین پلیٹ میں دھکیلتی ہے ۔ یہ ٹیکٹونک حرکت نہ صرف ہمالیہ کے پہاڑوں کو بلند کرتی ہے بلکہ زمین کی سطح کے نیچے انتہائی تناؤ بھی پیدا کرتی ہے۔ جب یہ تناؤ چٹانوں کی طاقت سے زیادہ ہو جاتا ہے ، تو یہ زلزلوں کی صورت میں خارج ہوتا ہے ، جس کے نتیجے میں نیپال اور آس پاس کے ہمالیائی خطے میں اکثر زلزلے کی سرگرمیاں ہوتی ہیں۔